Расказваем, што эксперты думаюць пра новы указ, які дазваляе паляванне на мядзведзя і рысь у асаблівым рэжыме.
18 лістапада, Лукашэнка падпісаў Указ нумар 420, якім карэкціруюцца Правілы палявання і Правілы вядзення паляўнічай гаспадаркі. Указам дазваляецца паляванне на мядзведзя і рысь у асаблівым рэжыме, які як быццам дазваляе “кантралюема рэгуляваць іх колькасць асобін”, бо колькасць гэтых жывёл узрасла і мае патрэбу ў рэгуляванні. Асноўныя палажэнні Указа ўступаюць у сілу праз шэсць месяцаў пасля афіцыйнага апублікавання.
— Трэба разумець, што гэта ўсё робіцца не для таго, каб кіраваць папуляцыямі мядзведзя і рысі, а для таго, каб прывілеяваны адсотак паляўнічых, хаця б адзінкі з іх, якім вельмі карціць, маглі легальна застрэліць гэтых жывёл, — каментуе эксперт Экадома. — Я не думаю, што гэтая мажлівасць будзе тычыцца звычайных сябраў Беларускага таварыства паляўнічых і рыбаловаў. Хутчэй за ўсё, на такое будуць прыязжаць замежнікі або прывілеяваныя людзі з Беларусі. Не здзіўлюся, калі адным з першых і стане сам Шуневіч.
Указ дазваляе паляванне ў асаблівым рэжыме на падставе Планаў кіравання гэтымі відамі. Гэта значыць, што, напэўна, як і з зубрам, будуць выдзелены часткі папуляцыі, пэўная колькасць гэтых жывёл, месцы або сітуацыі, пры якіх на рысь і мядзведзя можа будзе паляваць. Напрыклад, у нейкай паляўнічай гаспадарцы мядзведзяў стане больш за дзесяць, то адзінаццатага можна будзе забіць.
— Такі статус віда лепш за скасаванне аховы, у навуковых арганізацый застаюцца механізмы ўплыву, для мядзведзя і рысі застаюцца механізмы аховы, прадугледжаныя для відаў, што занесены ў Чырвоную кнігу. Але калі будуць ўстаноўлены нейкія лініі, колькасць асобін, павышэй за якую можна забіваць, то менавіта самі паляўнічыя і будуць тымі, хто гэтую колькасць ацэньвае. Правяраць і кантраліраваць дадзеныя ўлікаў дзікіх жывёлаў цяжка, нягледзячы на вялікую колькасць кантралюючых органаў.
Па словах эксперта, распрацоўка Планаў кіравання для відаў — гэда дастаткова распаўсюджаная практыка. Мэтай такіх планаў з’яўляецца падтрыманне спрыяльнага статусу віда ў прыродзе:
— Трэба памятаць, што мы жывем у рэаліях сучаснай Беларусі, дзе мажлівасць грамадскага і дзяржаўнага кантролю над пэўнымі структурамі і ведамствамі невялікая. Таму можна чакаць, што планы кіравання будуць напісаны і зацверджаны, але яны будуць хутчэй фармальнай падставай, каб нехта мог прыехаць і застрэліць рысь або мядзведзя, бо мажлівасці праверкі якасці і кантроля выканання гэтых планаў у нашым грамадстве няма.
