Яшчэ зусім нядаўна людзі ўмела фарміравалі гарадскую інфраструктуру вакол прыродных зон, асцярожна упісваючы будынкі ў навакольнае асяроддзе, ствараючы камфортныя ўмовы для жыцця. Сёння ж можна назіраць абсалютна адваротную карціну, калі пад патрэбы інвестыцыйных праектаў горад Мінск пазбаўляецца сваёй унікальнасці і зялёных зон. Адным з такіх аб’ектаў, які патрапіў пад «раздачу», стаў водна-зялёны дыяметр. Зялёны партал спытаў шэраг спецыялістаў і вядомых людзей, што яны думаюць на гэты конт.
«Для мяне водна-зялёны дыяметр — неверагодны прыродны аб’ект уздоўж ракі, які не проста ўпрыгожвае горад, а дае магчымасць для адпачынку, веласпорту і іншага. А значыць, дапамагае захоўваць здароўе мінчан. І гэта канкрэтны эканамічны эфект: жыхары менш хварэюць, менш атрымліваецца бальнічных лістоў, менш выдаткаў на іх лячэнне з бюджэту», — кажа Рыгор Фёдараў, юрыст грамадскага аб’яднання «Экадом». І дадае: «Гэта вельмі важны для вялікага горада экалагічны аб’ект».
Па яго меркаванню, праблема знішчэння тэрыторыі водна-зялёнага дыяметру ў тым, што генплан зацвярджаецца ўказамі прэзідэнта, змяняць яго таксама можна ўказамі. Гэта дазваляе вымаць з гарадскіх зялёных зон участкі і пераводзіць іх у зоны грамадскай і іншай забудовы.
«У гэтым сэнсе водна-зялёны дыяметр знаходзіцца на «адной паліцы» з усімі зялёнымі зонамі. Наўрад ці можна прыдумаць асобны спецыяльны статус канкрэтна для яго, і, напэўна, не патрэбна, — зазначае юрыст. — Што можна зрабіць? Прапісаць экалагічную функцыю зялёных зон і забараніць змяншаць плошчу іх участкаў».
Сярод сваіх улюбёных месцаў Рыгор назваў заказнік «Лябяжы» і зялёную зону ля ўніверсаму «Свіслач».
«У гэтых месцах найбольш поўна захавалася прырода. Для буйнога прамысловага горада гэта неверагодна!» — адзначыў ён.
greenbelarus.info
